Futbolean eta areto futbolean larunbat garrantzitsua izan da gaurkoa. Liga amaierako partidak jokatzen ziren Berazubin, Belabietan eta Usabalen. Hiru talde eta bi igoera postu jokoan. Saria Tolosa CF-k eraman du: Hirugarren Mailarako igoera. Horretarako etxean irabazi behar zuten urdinek. Hori ez zen nahikoa, ordea, Anaitasunak liderraren aurka galdu beharra zeukan. Bi emaitza horiek eman dira. Tolosa CF-k 3-0 irabazi dio Añorgari Berazubin, eta Anaitasunak Eibarren aurka 3-0 galdu du. Sailkapenean Tolosa CF-k bigarren amaitu du denboraldia. Eibar izan da txapeldun baina igoerarik gabe geratuko dira eibartarrak harrobiko taldea izaki. Tolosa CF, beraz, zuzenean Hirugarren Mailako taldea da.
Areto futbolean, Lauburu KE Ibarra zen igoera lortzeko aukera zuena. Ibartarrek irabaziz gero, eta liderrak galduta, Lauburu igoera faserako sailkatuko zen. Bigarren B Mailan jarraitu beharko dute, ordea, ibartarrek. Etxean euren partida 5-4 irabazi dute, baina Alzira berean 1-4 nagusitu da. Liderrak Usabalen jokatu du ligako azken partida hori, Laskorainen aurka. Sailkapen nagusian, saririk gabeko bigarren postuan geratu da Lauburu KE Ibarra. Laskorainek hamaikagarren egin du.