Tabakorik gabeko Munduko Eguna izango da maiatzaren 31. Tabakoaren eta kalamuaren kontsumoa murrizteko helburuarekin, eta Aukeratu, ez erre filtroa izenburupean, Instagram-eko argazki lehiaketa antolatzeko elkartu dira Tolosaldean osasun arloan aritzen diren zenbait erakunde. Gipuzkoako Minbiziaren Aurkako Elkartea, Amasa-Villabona Udala, Tolosako Udala, OSI Tolosaldea, Asuncion Klinika eta Tolosaldea-Goierriko Osasun saila koordinatuta aritu dira Nerabezarorako Prebentzio Mahaiaren testuinguruan antolatutako kanpainan.
Duela lau urtetik hona garatzen dira ekimenak eskualdean prebentzio asmo horrekin eta Instagram-eko lehiaketaz gainera, tailer hezitzailea egingo dute zenbait ikastetxek Tabakoa-kalamua korapiloa izenburupean. Nerabeei zuzenduta egingo dira tailerrak maiatzean zehar, substantzia horiek kontsumitzearen inguruko hausnarketa sustatzeko.
Gainera Tabakorik gabeko Munduko Egunean ekitaldi bat egingo da jardueraz betetako hilabeteari amaiera emateko, eta bertan, Instagram-eko lehiaketako sariak banatuko dira eta aurkeztutako argazkien erakusketa osatuko da. Kaleko ekintza bat ere iragarri dute antolatzaileek, herritarrak tabakoa eta antzeko beste substantzia batzuk kontsumitzeak dituen arriskuez sentsibilizatzeko.