Kultur eragileak, kirol taldeak, norbanakoak, sindikatuak, enpresak, talde politikoak, ikastetxeak... Era guztietako erakundeek hartu dute parte aurtengoan. Guztiek osatu dituzte euren metroak, eskuz esku, bihar eguerdian Gasteizen irakurriko den mezua barruan daraman lekukoa pasaz.
Berdin zion orduak, baita ibilbideak ere. Adin guztietako herritarrek hartu dute parte, izan pankarta aurrean edota atzean. Lekuko aldaketa bakoitzean, indar handiagoz ekin baitiote euskararen aldeko aldarriari. Irribarrea nagusi izan da herritarren aurpegietan, eta herri nagusietan sartu denean, ingurukoen babesa jaso dute. Batzuk lo eginda, beste batzuk parrandatik segidan, baina guztiak ere, helburu edo asmo bakar batekin.
