21. Korrika - 2019

Irura eta Anoeta Korrika Txikiak elkartu ditu

Ikastoletako haur, gaztetxo eta irakasleak korrika ibili dira arratsaldean, bi herrietan barrena, umore eta giro ederrean.

15:00etan irten dira Irurako Ikastolako nagusienak Korrika. Herrian barrena kokaturik, lekukoaren zain zeuden ikasle gazteagoak. Txandaka txandaka Anoetako zubiraino iritsi dira. Bertan, anoetarrek egon behar zuten, baina ez zeuden. 15:30etan zen hitzordua, eta irurarrak azkarregi iritsi dira. Txantxa eta algara artean itxaron diete bizilagunei. Hauek korrika eta presaka iritsi dira, eta lekuko aldaketaren ondoren, Korrika Txikiak Anoetan barrena jarraitu du umoretsu azken urteetako Korrika kantuen artean. Herri Ikastolako ikasle desberdinek hartu dute lekukoa ikastetxera iritsi aurretik.

Anoetarrek eta irurarrek agerian utzi dute Korrika antolatzaileek duten meritua: ez da erraza lekukoa Euskal Herri osoan barrena eramatea modu koordinatuan.

Tolosaldeko albisteak euskaraz, libre eta kalitatez jasotzea nahi duzu?

Horretarako zure babesa ezinbestekoa zaigu. Egin zaitez Atarikide!


EGIN ATARIKIDE!