Alegiako osasun etxean elkarretaratzea egin dute gaur, Lehen Arretak bizi duen egoera oso larria dela salatzeko. Sindikatuek, aldi berean, bi greba egun deitu dituzte; apirilaren 12an eta maiatzaren 17an. "Osakidetzako Lehen Arretak bizi duen egoera oso larria da. Azkeneko urteetan, behin eta berriz salatu dugu Lehen Arreta eraisteko apustu bat dagoela. Horren adibide garbia dira 2007tik Osakidetzak emandako pausuak. Osasungintza publikoaren eraispena eta Osakidetzak bizi duen egoera larria, gure agintarien murrizketa politiken ondorio zuzena dira: lanpostuen suntsiketa, lantalde gero eta txikiagoak, behin-behinekotasun tasen igoera; zerbitzuen pribatizazioa; bajak eta absentziak ez dira ordezkatzen; hutsik dauden lanpostuak ez dira betetzen; iruzurra behin-behineko kontratazioan; lan kargak gero eta handiagoak; erosahalmenaren galera; gaixotasun bajen zigorra; etab. luze bat". Horiez gain, "zuzeneko murrizketak" aipatu dituzte, "Garapen Profesionalean egindakoa adibide argia delarik".