Gauzak gerta daitezke norbere buruan, kale ertzean edo munduan; gu geu gara gertaera bat. Baina, gertatzea, badira beste gauza asko ere: gauza gehienak ez direlako gertatzen, giza-talde oso batek gertatutako horren berri izaten duen arte.
Eta, ez kontatzea ez existitzearen pareko denez, horretan dihardugu egunero: besteen bizipenak albiste bilakatzen; besteren ahotsari hitzak jartzen. Tabernariak, gazteak edo ikasleak. Puntako zientzialariak, edo pentsiodunen borrokan lehen lerroan ari direnak. Prostituta ohiak, edo euskaraz ikasten ari diren migratzaileak. Emakumeak. Eskualdeko emakumeen errealitateek ere idazten baitute, egunero, Tolosaldeko Ataria; eta, oraindik, asko dira idatzi gabe daudenak.
Horregatik, bihar, Atariako emakumeok ere bat egingo dugu gure hitzen ahotsa izan diren horiekin 
guztiekin; haiena ere badelako gure borroka. Bihar, ez dugu besteena kontatuko; bihar, gu izango gara albistearen zati. Guk ere eskatuko dugu zaintza zaintzea eta, oihukatuko dugu, ez dugula zenbaki huts izan nahi; kontagarri eta kontalari izan nahi dugula. Martxoaren 8aren ondoren ere kontatu nahi baitugu, greba egitea bera pribilegio hutsa dela emakume askorentzat. Eta, hori hala izanik ere, kontatu nahi genuke, 2019ko martxoaren 8an, mundua geratzea izan zela mundua eraldatzeko motorrik onena. Bihar, gertatu egingo gara.
Tolosan eta Alegian ez da banatuko 'Tolosaldeko Ataria'
Ataria-ren banaketaz arduratzen den Etxeraino enpresako emakumeek ere greba deialdiarekin bat egingo dute. Martxoaren 8an ez da Tolosaldeko Ataria-rik banatuko Tolosan eta Alegian. Atarikideek egunean bertan astekaria jasotzeko aukera izango dute Ataria-ren egoitzan, Tolosako San Esteban auzoko 20 zenbakian.