Tolosaldea Sahararekin elkarteak "oso presente" du saharar herriak bizi duen "ezohiko egoera". Izan ere, 1976ko otsailaren 27an, hiru eremutan zatitu zuten, eta oraindik, Sahara Marokotik askatzeko aldarrikatzen jarraitzen dute.
Gaur arratsaldeko elkarretaratzean, Saharar jatorriko eta eskualdeko dozenaka herritar bildu dira, Saharari elkartasuna adierazteko. Besteak beste, "Sahara, askatu!" eta "Maroko errudun, Espainia arduradun!". Agerraldian, gainera, 'Maroko, mendebaldeko Saharatik kanpora. Lurra eta erabakia' leloa zeraman pankarta izan dute eskuartean bertaratutakoek.
Bestetik, atzoko Tolosako Udalaren osoko bilkuran, udalak Tolosaldea Sahararekin elkarteak aurkeztutako mozioa aho batez onartu zuen. Gaur, urteurrenarekin bat etorriz, egun osoan, udaletxeko balkoian Mendebaldeko Saharako bandera zintzilikatu dute.
Urte luzeko lana
2000. urtetik gaur arte Saharara begira jarrita ditu begiak Tolosaldea Sahararekin elkarteak. Hemeretzi urte dira elkartea sortu zela, "Saharar herriari laguntzeko helburuarekin".
Elkarteak urteak daramatza sahararrei elkartasuna adierazteko ekintzak aurrera eramaten. Horien artean, gaurko elkarretaratzea. Bestetik, Oporrak Bakean haurren harrera programa ere burutzen dute, eskualdeko zenbait herrietara haur eta gaztetxo ugari etortzen direlarik. Elkarteko kideek aipatu ohi duten moduan, "espero dugu hau izatea azken urtea".
