Udan Saharako haurrak hartzen dituzten familiaz bete da Topic aretoa, bertan aurkeztu baitute 2019ko Oporrak Bakean programaren bideoklipa. Programa honen bidez Saharako kanpamenduetako haurrek Euskal Herrian igarotzen dute uda.
LBV musika taldeak egindako bi familia izeneko bideoklip honekin erakutsi nahi izan dute haur horiek bi familia izaten dituztela, bat Saharan eta bestea Euskal Herrian. Bideoan ere haur euskaldun bat eta saharar bat dira protagonista eta nola ezagutzen diren eta agurtzen diren agertzen da baita Euskal Herrian udan bizitakoa ere.
Familia berrien beharra
Udan Saharako haur bat hartzea bizipen oso polita dela esan dute eta sortzen diren erlazioak bereziak direla. Herritarrak haur saharar gehiago hartzera ere animatu nahi dituzte: “Guztiek irabazten duten erlazio bat da”, diote antolatzaileek.
Oraindik herri sahararrak erreferendumaren zain jarraitzen duela ere salatu dute. Antolatzaileek diotenez, 2019ak izan beharko luke erreferendumaren urtea, herri sahararrak erabaki eta Mendebaldeko Saharara itzultzeko urtea.