Oinezko bideak lotuko ditu Alegia eta Altzo

Oinezko bideak lotuko ditu Alegia eta Altzo

Alegia eta Altzo lotuko dituen oinezko bidearen lanak iazko urte amaieran hasi zituzten bi herrietako udalek. Altzoko Udalak proposatu zion bidea gauzatzearen ideia Alegiakoari, eta adostasunera iritsi ostean, hitzarmen bat sinatu zuten, eta bakoitzak bere zatia bideratu du.

Joseba Elduaien Altzoko alkateak argitu du, mugikortasunaren gaia lantzen ari direla udaletik, eta urteetan udal ordezkari ezberdinek izan duten ideia dela martxan jarria dutena. Bide honekin «autoa etxean uztera bultzatuko ditugu herritarrak, eta Altzotik Alegiako plazarainoko bidea errepiderik gurutzatu gabe egiteko moduan izango dira herritarrak», azaldu du. Herritar guztientzat, eta paseoan ibiltzen direnentzat ere «onuragarria» izango dela adierazi du.

Errepideko lanak Gabonen aurretik bideratu zituzten bi herrietan. Altzon, momentuz, ez dute asfaltatuko bidea, harri xehe edo hartxintxarrarekin utziko dute. Hesitu egingo dute, eta «etorkizunean argiteria jarri ahal izateko dena prest utziko dugu», gehitu du Elduaienek. Alegiaren kasuan, Beistin auzotik hilerrirainoko bide guztia prest dute asfaltoa bota eta argiteria jartzeko. Oraindik, ordea, zehazki ez dakite noiz hasiko diren lan horiek egiten. «Uda baino lehen bukatzea espero dugu», azaldu du Unai Iraolak.



Alegiak gutxi gorabehera 25.000 bat euroko aurrekontua izango du lanak egiteko, eta Altzoko Udalak, berriz, 20.000 euro inguru gastatuko ditu. Altzon, diru laguntzak eskatuta dituzte lanak gauzatzeko, eta Elduaienek aurreratu duenez, osasun alorretik laguntza txiki bat jasoa dute.

Auzia ez da izan ala ez izan. Kontua ekitea da. Atarikide egitea, euskararen aldeko hautua egitea, zure herrian gauzak antolatzea, horren berri ematea, etxetik plazara salto egitea. TOLOSALDEKO ATARIA egiten duzun hori da. Egiten duzun neurrian gara.

Egin Atarikide!