Tolosaldeko hainbat herritan Santa Ageda bezpera eguna ospatu dute. Gehienetan baserriz baserri ibili dira kantuan, bertsolariak lagun zituztela. Ikaztegietan, dozena bat herritar elkartu dira, gehienak emakumeak, nahiz eta gizonak ere parte hartzeko aukera duten. Anoetan, ikastolakoak herrian barrena zebiltzan bitartean hainbat anoetar baserrietara joan dira. Ondoren guztiak elkartu dira.
Asteasun Pello Errotaren heriotzaren mendeurrenaren harira ekitaldi berezia egin dute. Maialen Lujanbio, Oihana Iguaran, Aitor Sarriegi eta Haritz Mujika izan dira kantuan, baserriz baserri herritarrekin batera. Bi taldetan banatuta baserrietara joan dira aurrena, ondoren herrian elkartzeko.