Nagusien mailan, binaka, Eneko Labakak DV Txapelketa irabazi du, Uriondo atzean duela. Txapelketa horretan, Albizturko aurrelariaren 3. txapela da; hiruak jarraian. Finalean, Ioritz Egiguren eta Oier Etxeberria gainditu dituzte, 22-12ko emaitzarekin. Egiguren tolosarra izan da txapela irabazi ez duen eskualdeko ordezkari bakarra. Izan ere, Etorkizuneko pilotarien finalean Iker Elizegi asteasuarrak, Ander Murua aurrean zuela, 22-11 irabazi die Julen Egiguren eta Markel Gartziari. Lau eta erdiko finalean, berriz, Miren Larrarte bidaniarrak 22-20 irabazi dio Leire Garairi.
