Hori lortzeko gakoa, baina, gizartearen aktibazioan dagoela uste dute: «Jendartearen gehiengoaren nahia da. Horretarako, espetxe politika definitzen duten estatuengan eragitea dagokigu, aurrera urratsak ematea guztion ardura baita. Giltza, beraz, gizarte zibilaren aktibazioan dago; hau da, eragile, politikari, alderdi, ordezkari, sindikatu, instituzio eta norbanako ororen aktibazioa eta inplikazioa bultzatzea da gakoa».
Bide horretan, urtarrilaren 12an Bilbo eta Baionara joateko deia luzatu dute: «euskal presoen auzia askatzeko eta espetxe politika honekin behingoz amaitzeko aldarriaren atzean jendarte osoa dagoela erakutsiko diegu, bai Frantziako, bai Espainiako estatuei. Aspaldian izan dugun aukerarik onena daukagu orain eskuartean; elkarbizitzarako, elkarrekin aritzeko eta guztiontzako izango den bakea eraikitzeko. Esperantzarako unea bada, baina baita aktibaziorako unea ere», gehitu dute Orain Presoak dinamikako ordezkariek.
Urrats horiek, iragana ahaztu gabe egingo dituztela gaineratu du dinamikak. «Indarkeria guztien biktimei zor zaie egia, errespetua eta errekonozimendua. Baina iragana ez errepikatzea ere zor diegu gure ondorengoei, eta horretarako elkarlana ezinbestekoa da. Guk bide horretan sakondu nahi dugu. Auzi honek erabateko konponbidea izan dezan, elkarlanean aritu behar dugu guztiok».