Azaroaren 21ean, asteazkena, Julio Suarez zuzendariaren Leo a la vida dokumentalaren estreinaldia izango da Villabonako Subijana etxean, Mintzolako areto nagusian, 20:00etan.
Leonela Relys pedagogoaren bizitzan oinarritzen da ikus-entzunezkoa, eta analfabetismoa du gai nagusitzat. Yo sí puedo, gaur egunera arte asmatu den alfabetatze metodo modernoenaren sortzailea da Relys. Hain zuzen, 12 milioi pertsona alfabetatu dira hamarkada bateko epean metodo honen bidez, eta besteak beste, UNESCOren sari bat jaso du.
Pertsona ugariren testigantzak biltzen ditu Kuban, Venezuelan, Haitin edota Katalunian grabatutako dokumentalak, eta zeharkako beste gai ugari ukitzen ditu: pertsona eta gizarteen arteko ezberdintasun egoerak, bazterkeria, pobrezia...
Leo a la vidak sari ugari jaso ditu, besteak beste, dokumental onenaren saria World Woman Awards edo Orinaga Sarietan, aurten. Habanako 39. Nuevo Cine Latinoamericano jaialdian estreinatu zuten, eta baita arrakastaz egin ere, zinema aretoak betetzea lortu zuen ikus-entzunezko bakarra izan baitzen.
Ostiralean, Kuba eta Katalunia hizpide Zizurkilen
Kataluniako Guerrilla comunicacional taldeak antolatuta, ostiralean beste hitzordu bat izango da Zizurkilgo Plazida Otaño liburutegiko areto balioaniztunean. Habanako (Kuba) eta Salteko (Katalunia) bi emakumeren arteko gutun trukaketa batetik sortutako Tengo algo que contarte liburuaren aurkezpena egingo dute.
La Habanera eta Vicentita ezizenez dira ezagun bi protagonistak, eta hain zuzen, azken hau Zizurkilen izango da bere esperientzia kontatzen. Emanaldia 19:00etan hasiko da.