Elkarteak «elkartasun eta babes osoa» adierazi die beraien lana egiten ari zirela erasotuak izan ziren kazetari horiei denei, eta nabarmendu du «onartezinak» direla «hainbat hedabidetako langileek pairatu behar izan zituzten oztopo eta erasoak (bultzadak, irainak, lanerako tresnak kentzeko saiakerak...), eraso horiekin kazetari horiei ez ezik, herritar orok informaziorako eta adierazpen askatasunerako dituen eskubideei ere eraso egiten zaielako».
Erasotutako hainbat, euskarazko hedabideetako kazetariak zirenez -Antxeta irratia, Berria...– «informazioa euskaraz jasotzeko eskubidea bera ere erasotua» izan zela uste du Hekimenek.
Era berean, Hekimeni «oso larria iruditzen zaio aipatutako erasoak une horretan ordena publikoaren ardura bere gain zuten ertzainen aurrean gertatu arren, hauek kazetariak babesteko edota erasotzaileak geldiarazteko inolako neurririk hartu ez izana».
Berriro ere honelakorik gerta ez dadin eta kazetariek beren lana berme guztiekin egiteko aukera izan dezaten hartu beharreko neurriak hartzeko eskatu die Hekimenek dagokien erakunde publikoei.