Azken bi urteotakoa errepikatuz, Xabier Artola irurarrak eta Idoia Besada pasaitarrak irabazi zuten Donostiako Dantza Sueltoko txapelketa, joan den igande arratsaldean, Konstituzio plazan. Irabazleek 98,25 puntu jaso zituzten eta, azken bi urteetan bezala, jantzi onenaren saria ere jaso zuten.
Bigarren saria ere eskualdera bidean jarri zuen epaimahaiak: Ane Urruzola billabonatarrak eta Iker Sanz lezoarrak eskuratu baitzuten, 98 punturekin. Hirugarren saria, berriz, Larraitz Larrañaga eta Amets Amubieta bikote azpeitiarrak eskuratu zuen 90,50 punturekin.
Zarautzen, bigarren eta hirugarren
Hurrengo egunean, astelehenean, Zarauzko euskal jaietako txapelketa izan zen. Bertan Larraitz Larrañaga eta Amets Amubieta azpeitiarrak izan ziren txapeldunak, 73 punturekin.
Ane Urruzola eta Iker Sanz bigarren sailkatuak izan ziren, 72 puntu eskuratuta, eta Xabier Artola eta Idoia Besada hirugarren sailkatu ziren, 70 punturekin.