Diru laguntza honen bidez, emakumeen trainerua arlo lehiakorrenean sustatzea bermatu nahi da, kirol materialarekin, taldearen joan-etorriekin, zerbitzu teknikoekin, mediku zerbitzuekin, federazio gastuekin, aseguruarekin edota publizitatearekin lagunduz.
Olatz Peon Ormazabal alkateak nabarmendu du «oso pozgarria eta garrantzitsua» dela Tolosaldea emakumezkoen taldea berriro arraun liga profesionalean izatea: «lanketa handia du atzean eta bereziki arraunlarien dedikazio ikaragarria. Harro sentiarazten gaitu astebururo eskualdeko trainerua ur handitan ikusteak».
Emakumeen kirola sustatzea ere ezinbestekoa dela iritzi dio Tolosako alkateak, «sozialki, berdintasunean, kiroltasun balioen transmisioan eta ohitura osasuntsuei begira suposatzen duen balioa handia delako: Kirolean, eta arraunean bereziki, aurrerapauso ugari eman badira ere, ehuneko handi batean gizonezkoek osatua izaten jarraitzen du, bi modaliteen artean desberdintasunak egonaz, eta hori medio, emakumezkoen ligan gure emakumeen arraun kluba izateak bidea egiten du ere berdintasunaren errotzean eta hezkidetzan».