Euskal Herriko Sega Txapelketaren kanporaketak igande honetan jokatuko dira, Aiako Aristerrazu baserriko belardietan. 11 segalarik hartuko dute parte, eta horietatik lau Tolosaldekoak izango dira. 30 minutuko lana egin beharko dute bi multzotan banatuta.
Lehen kanporaketa 11:30ean hasiko da. Julen Gabirondo, Eneko Bilbao, Iban Pardo, Iñigo Mercader, Jon Otegi eta Andoni Goikoetxea gazteluarra ariko dira lanean. Lehen bi sailkatuek finalerako txartela lortuko dute.
Bigarren kanporaketa 12:30ean hasiko da, leku berean. Jokin Etxeberria amasarra, Igor Esnaola, Jexuxmari Ormaetxea orendaindarra, Mikel Lizartza tolosarra eta Suharri Irazustabarrenaren arteko lehia izango da. Hemen ere belar gehien mozten duten bi segalariak finalera pasako dira. Finala abuztuaren 5ean jokatuko da Asteasun.
Bestalde, Gipuzkoako bigarren mailako aizkolarien finala ere Asteasun jokatuko da, uztailaren 29an.