Erroizpe pasa ostean, Leaburu, Ibarra eta Tolosan jende ugari bildu da korrikalariei animoak emateko. Zumardian, Nafar zubian, Solana Kalean, Gaztelako arkuan... azken metroak txalo artean egin dituzte.
Eta askok, konpainiarekin, asko izan baitira beren guraso, lagun edo senideak eskutik heldu eta azken metroak emozio biziz korritu dituzten haurrak.
Ibilbidean asko sufritu arren, emozioa zen nagusi helmugan. Aurpegi alaiak ziren nonahi. Norberak bere buruari markatutako helburuak betetzean sentitu ohi den asetasuna sentitu dute Triangulora heltzean. Eta ez da gutxiagorako: T3T edo T2T egitea ez da nolanahikoa. Benetako meritua du.
Oier Ariznabarreta irabazlea, esaterako, lurrean etzan da helmugako marra zeharkatzean, ia ezinean. Arnasa behar zuen. Bolak igo zaizkion korrikalaririk ere izan da. Maite Maiora, lehen emakumea indartsu helmugaratu da, eta azken metroak berriro egin ditu zaleek bostekoa emanez. Besarkada artean hartu dituzte parte hartzaile asko.
Trianguloko zurrunbilotik at, korrikalari ugari gerturatu dira Tolosaldeko Arraun Klubaren instalazioetara, hankak garbitu, dutxa bat hartu... edota hankak Oria ibaian freskatzen jartzeko! Gero, bazkaltzeko aukera izan dute Zerkausian.