Gipuzkoa Ogi Berriko txirrindulariek asteburu borobila izan dute. Larunbatean Deban eta igandean Barrundian ibili ziren, eta emaitza bikainak lortu zituzten. Barrundian Euskadiko Txapelketa jokatu zen, Euskaldun Torneoaz gain. Kadeteetan, jubeniletan eta 23 urtez azpikoetan eskualdeko txirrindulariak izan ziren podiumaren lehen kaxoian. Kadeteetan Garazi Estebez izan zen txapelduna. Hori bai, hainbat arazo medio, Euskadiko Txapelketa bertan behera geratu zen kadeteetan.
Jubeniletan Gipuzkoa Ogi Berriko beste txirrindulari bat izan zen garailea: Izarne Maioz. Kasu honetan bai, Euskadiko Txapelketa jokatu zen eta Maioz izan zen txapelduna. 23 urtez azpikoetan gauza bera gertatu zen Eukene Larrarterekin.
Denboraldian egindako lanari esker, Eukene Larrarte Europako Txapelketan egongo da. Izarne Maiozek ere aukerak ditu, lehen hautatuen artean baitago. Oriako Limousin taldeko Naia Amondarain ere Maiozen egoeran aurkitzen da.