Gipuzkoako etxebizitza, denda eta enpresa txikien argindar kontsumoa murriztea du helburu Gipuzkoa Argitu programak, baita pobrezia energetikoaren prebentzioa eta murrizketa ere.
Horretarako herriz herri tailerrak eskaintzen ari da Gipuzkoako Foru Aldundiko Ingurumen Departamentua. Tailer horietan kontsumo datuak eskuratzeko jarraibideak ematen dituzte, datu horiek jakitea ezinbestekoa baita kontsumoa murrizteko. Era berean, aplikatzen den tarifa eta kontratatua dagoen potentzia egokiak ote diren egiaztatzen da. Informazio hori helarazteko 3 tutorial osatu ditu GFAk, eta saio horietan tutorial horiek praktikan jarriko dira.
Aste honetan hiru saio izango dira eskualdean, eta ekainean beste hiru herritan egingo dituzte hitzorduak. Hauek dira eskualdean antolatu dituzten saioak:
- Maiatzak 22, asteartea: ASTEASU, 18:30ean, Udaletxeko ikus-entzunezko gelan
- Maiatzak 23, asteazkena: AMASA-VILLABONA, 18:00, Subijana Etxean
- Maiatzak 24, osteguna: BERASTEGI, 18:00, Udaletxeko pleno aretoan
- Ekainak 5, asteartea: ADUNA, 18:00, Kultur aretoan
- Ekainak 5, asteartea: ZIZURKIL BEHEA, 20:15, Plazida Otaño liburutegian
- Ekainak 11, astelehena: LARRAUL, 19:30, Kultur Etxean
Tailer horien aurkezpena egin dute goizean Jose Ignacio Asensio, Ingurumen diputatuak, eta Maite Izagirre, Amasa-Villabonako alkateak. Bertan, Gipuzkoaren eredu energetikoaren aldaketan aurrera egiten ari direla nabarmendu du Asensiok: "Gipuzkoa Argitu programari esker, kontsumoa murrizteko neurriak gipuzkoar guztien eskura ari gara jartzen".
