Posible da. Joan den astean 2-1 galdu zuen Asteasuk Herriarteko txapelketan, baina bada esperantzarako tarterik.
Izan ere, aldea ez da horren zabala. Kadeteen mailan 1-22 galdu zuten Iban Lanzetak eta Gorka Huizik. Jubeniletan ere porrota jaso zuten asteasuarrek: Julen Huizik eta Iker Elizegik osatutako bikoteak 19-22 galdu zuen. Nagusien mailan lortu zuten garaipena, Xabi Urbieta eta Julen Aizpururen eskutik. Kadeteen mailako emaitzaren aurkakoa izan zen: 22-1.
Neurketa erabakigarria, alderik txikiena dagoena, alegia, jubenilena izango da. Hori irabaziz gero, tanto diferentziak aztertu beharko dira, eta beraz, gutxienez hiru tantoko aldeaz irabazi beharko lukete, final zortzirenetara pasatzeko. Irabaziz gero, Astigarragaren aurka neurtuko lituzkete indarrak.
20:00etan hasiko da pilota jaialdia, Usarrabi pilotalekuan.
Gomazko paleta ere bai
Aurten, lehenengoz, gomazko paleta modalitatean ere jokatuko da Herriarteko txapelketa, eta asteburuan hasiko da lehia. Tolosa eta Anoetaren arteko eskualdeko derbia izango da lehen kanporaketan, final zortzirenetan. Jaialdia Tolosako Beotibar pilotalekuan izango da, 19:40etik aurrera. Amasa-Villabonak, berriz, larunbatean jokatuko du Azkotiako Gurea frontoian, 17:00etatik aurrera.