Gipuzkoako Foru Aldundiko Turismo Departamentuak, 'Explore San Sebastian Region' turismo bulegoaren bidez, Gipuzkoako turismo sektoreko profesionalei zuzendutako bost bisita tekniko antolatu ditu, lurraldeko eta bere eskualdeetako leku berezienak bertatik bertara ezagutzeko.
«Eskualdeen Txokoa» ekimenari jarraipena ematea da xedea. Ekimen horren bidez, turismo sektoreko profesionalek lurraldea sakon ezagutzea bultzatu nahi dute, Donostiara iristen diren bisitariei lurraldeko beste leku batzuk aholkatzeko moduan izan daitezen.
Atzokoan, Goierri eta Tolosaldean izan ziren, Elikaduraren eta Gastronomiaren Interpretazio Zentroan harrera egin ostean, Ordiziako azokara joan ziren. Gero, Segurako gaztandegi bat bisitatu zuten artzain baten laguntzarekin, eta Idiazabal gazta dastatzeko aukera izan zuten.
Txindokiren magalean, Larraitzen, Txindokiko Itzala abentura parkea ezagutu zuten. Tolosan ere izan ziren, bertako produktuak dastatuz. TOPIC Nazioarteko Txotxongilo Zentroa bisitatuz eman zioten amaiera jardunaldiari.
«Tradizio turistikorik izan ez badute ere, gaur egun bisitatzeko aukera harrigarri eta desberdinak eskaintzen dituzte herri hauek, eta hori indartu behar dugu. Hori lagungarri izango da turista fluxuak geroz eta orekatuagoak izan daitezen. Guztion artean lortzen badugu Donostia lurraldera irekitako helmuga zabal gisa hartzea eta hainbat egun igarotzeko modukoa dela erakustea, ziurrenik egonaldien batez bestekoa hazi, eta bisita errepikatuak areagotu egingo dira», azaldu du Maite Cruzadok.