Espainiako zein Frantziako espetxeetan ehunka preso politiko daudela gogoratu nahi izan zuten atzo, hainbat herritarrek, Kalera Kalera dinamikarekin bat eginaz. Larunbatean manifestazioa egingo dute Bilbon, 17:30ean, La Casillatik aterata, eta eskualdetik ere bertaratzeko deia egin zuten.
"Espetxeetan ehunka preso politiko dauden artean, hemen ez da benetako bakerik ez normalizaziorik. Presoak kalean behar ditugu", esan zuten. Lehentasunak ere finkatu zituzten: dispertsioarekin eta urruntzearekin amaitzea, gaixorik larri dauden presoen etxeratzea eta lehen graduko kalifikazioa orokortutik ateratzea. Izan ere, Espainiako espetxeetan dauden presoen %92a etxetik 400 kilometro baino gehiagora dago urrunduta, 22 preso daude gaixotasun larriren batekin, eta "Espainiako Estatuak euskal presoen %95 giltzapetuta ditu salbuespeneko erregimen itxian. Lehen gradua ezinezkoa da legedia arruntaren edozein aukera probestu", esan zuten.
Bukatzeko, Frantzian espetxe politikan eman diren mugimenduak ekarri zituzten gogora, "hegoaldean ere mobilizatzen eta adostasunak batzen jarraitu behar dugu Madril mugiarazteko".
Deia egin eta gera, presoen inguruan ematen ari diren mugimenduen inguruko azalpenak emateko hitzaldia egon zen. Sortuko presoen batzordeko Antxon Lopez Kubatik eta Jokin Urain Kixkurrek eskaini zuten hitzaldia.