Analisia: «Eskualdekoek ez dute finalerdietarako bide errazik»

Tolosaldeko Ataria 2018ko api. 12a, 10:35

Zozketa jarraitu ondoren, finalerdietarako, Bengoetxea VI.a, Urrutikoetxea, Olaizola II.a eta Irribarria etorri zitzaizkidan segidan burura. 

Talde gogorrena, berriz, Jokin Altunarena iruditzen zait, aurkari guztiak beteranoak direlako: Victor, Julen Retegi eta Urrutikoetxea.

Jakarena ere ez da atzean geratzen. Lizartzarra txisparekin dago, baino Lasori irabaztea kostako zaio, oso pilotaria arriskutsua baita nafar gaztea; edonori ezustekoa emateko modukoa.


Iñaki Artola oso ondo iritsiko dela uste dut, baina bere multzoan Bengoetxea VI.a dauka, ez dagoen lekutik gauza asko ateratzen dituen pilotaria. Aurrena, ordea, lehen partida irabazi beharra dauka horretarako.


Bestalde, Promozio Txapelketan kontuz Jon Erasunekin. Zizurkildarrak buruz buru asko jokatzen du, eta Agirreri kosta egingo zaio partida irabaztea. Beñat Urretabizkaia, berriz, eskuetatik nola iristen den ikusteko dago. Partidarik jokatu gabe denbora darama, eta ez dakit unerik onenean iritsi zaion txapelketa. Peña II.a, azkenik, behetik gora egiteko aukera gehien duen pilotaria dela iruditzen zait.

Luis Galarraga, pilota aditua

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!