Esteve Materrak 1617an idatzi zuen Doctrina Christiana, Lapurtera Klasikoz idatzitako lehen obra. Euskaraz inprimatutako lehen liburuetako bat ere izan zen, baina, ale guztiak galdu, eta lehen edizioa ezezaguna zen. Orain hiru urte, ordea, Dorota Krajewska UPV/EHUko Hizkuntzaren eta Literaturaren Didaktika saileko ikasle eta ikerlariak Doctrina Christianaren lehen edizio bat aurkitu zuen Danimarkako Errege Bibliotekan.
Horrela, Krajewska eta Aziti Bihia Hizkuntzalari eta Filologo taldeko zenbait kidek Materraren lanaren edizio kritikoa prestatu dute, galdutzat zuten lehen edizioa eta Oxforden gordetako 1623ko bigarren argitalpena baliatuz. Borja Ariztimuño tolosarra eta Urtzi Reguero zizurkildarra aritu dira, besteak beste, Aziti Bihiako lan taldean, eta gaur aurkeztu dute edizioaren argitalpena, EHUko eta Euskaltzaindiako kideekin batera.
Azaldu dutenez, Esteve Materraren lanak informazio oso baliagarria eskaintzen du orduko (XVII. mendea) testuen irakurle motaz. Halaber, ondorioztatu dute, Materra uste izan dena baino pertsona garrantzitsuagoa izan zela, euskal literaturaren esparruan nahiz hortik kanpo.