Julen Sarasola asteasuarrak, Xabier Galarraga albizturtarrak eta Pablo Martin tolosarrak Orona Fundazioa PBL 2018 saria irabazi dute, beste bi ikaskiderekin batera (Irene Gastesi irundarra eta Ion Etxezarreta beasaindarra). Sei hilabetean jorratutako egitasmoak aurkeztu behar izan dituzte ingeniaritzetako ikasleek, eta Sumobot robot prototipoa aukeratu du epaimahaiak, 446 proiekturen artean. Horrela, garaikurrarekin batera, 1.000 euroko ordainsaria jaso dute.
Mondragon Unibertsitateak eta Orona Fundazioak hirugarrenez antolatutako sariketa da, Project Based Learning (Proiektuetan Oinarritutako Ikasketa) metodologia garatzeko helburuz eta, finean, benetako arazoak ebazteko lan egin behar izaten dute ikasleek; Europa iparraldean nahiz Amerikar Estatu Batuetan baliatzen dute metodologia. Mondragon Unibertsitateko ingeniaritza espezialitate guztietako ikasleek lantzen dute PBL metodologia –2.200 inguruk–, eta 27 proiektu pasatu ziren, martxoaren 6ko finalera; unibertsitateko irakasleek eta, Orona, Ikerlan, Gureak, Innobasque eta Beterriko ordezkariek, horrela, Sumobot proiektua aukeratu zuten.
Robot prototipoa da Sumobot, eta roboten arteko borrokarako diseinatu dute. Japoniako sumo arauak oinarri hartuta, robotak arau horiei jarraitzen die eta, ondorioz, aurkaria lurrean marraztutako zirkulutik ateratzeko lan egiten du. Sarasola, Galarraga, Martin eta beren taldekideak ingeniaritza mekanikoko hirugarren mailako ikasleak dira.