Udaletako eta aldundietako langileak lanuzte eta grebara deituta zeuden gaurko, zerbitzu eta sektore publikoaren alde. Norbere herrian elkarretaratzeak osatu, eta Donostiara bertaratzekoak ziren, herrialdeko manifestazioan parte hartzeko. Elurteak, ordea, protestarako aurreikuspenei ere traba jarri die, eta udal langileek, zenbait kasutan, aldatu egin behar izan dituzte mobilizazioei begira hartutako erabakiak.
Eskualdean, besteak beste, Tolosako, Anoetako eta Irurako udal langileek elkarretaratzeak egin dituzte, udaletxe atarietan. Ordea, deialdia bateratua izanagatik, denboralearen aurrean sindikatu bakoitzak bere erabakia hartu du. LABek elkarretaratzeak bakarrik mantentzea erabaki du, elurteak grebaren eragina murriztu eta langile zenbaiten jarduna bikoiztu duela argudiatuz; ELAk, berriz, eutsi egin dio deialdiari. Horrela, Tolosan, esaterako, langileek batzarra egin dute elkarretaratzearen aurretik: udal langileen greba bertan behera uztea erabaki dute, elkarretaratzea bakarrik eginez.
Mobilizazioak administrazioetako arduradunen jarrera salatzeko antolatuta zeuden, "egoerari buelta ematen saiatzeko. Sektore publikoan lanpostu asko galdu egin direla diote sindikatuek, eta behin-behineko kontratazioek gora egin dutela.
Gaur egun, behin-behineko lanpostuen tasa %36koa da, baina, sindikatuek uste dute, Eudelekin sinaturiko Udalhitz protokoloak, gehienez ere, behin-behineko lanpostuak %6 izatea baimendu beharko lukeela. Finean, zerbitzuen pribatizazioa salatu nahi dute.
