Hernani eta Irurtzunek ikuskizun bikaina eskatu zuten, eta hirugarren partidan erabaki zen finalerdia.
Lehen partida, lau t’erdikoa, Hernanik irabazi zuen: 18-1. Arrieta gaztearen jokoa ikusgarria izan zen. Bolada oso onean zegoela erakutsi zuen hernaniarrak, eta Ogayk ezin izan zuen ezer egin.
Bigarren partida kantxa osoan jokatu zuten, buruz buru. Irurtzunek Olano aurrelaria jarri zuen kantxan, eta Hernanik Lizeaga atzelaria. Nafarra izan zen nagusi, 18-7. Partida serioa jokatu zuen Olanok, eta Lizeagak ezin izan zuen bere jokoa erakutsi.
Banakoarekin iritsi ziren bi elkarteak hirugarren partida erabakigarrira. Binaka, berriro ere nafarrak izan ziren nagusi, finalerako txartela lortuz. Olazabal-Bergera bikoteak 22-15 irabazi zien Ojuel-Azpitarteri. Partida borrokatua izan zen lehen tantoetan. Bigarren zatian, ordea, Irurtzungo bikoteak pilota aldatu eta tartea zabaltzea erabaki zuen. Hernaniarrek Ojuelen sakeari esker tartea murriztea lortu zuten, baina ez zen nahikoa izan; partida eta kanporaketa Irurtzunen aldera erori zen.
Bigarren finalerdia igande honetan jokatuko da Tolosako Beotibarren, 17:30etik aurrera. Alde batetik, Amezketako Zazpi Iturriko pilotariak izango dira protagonista, eta bestetik, Ulzamako Buruzgainekoak.
Irurtzun eta Zazpi Iturri edo Buruzgainen arteko finala otsailaren 18an jokatuko da, Tolosan.