Tolosaldea guztiko herritarrak deituta zeuden eta hotza, euria, haizea… eginagatik ere, manifestazio jendetsua izan zen. Hori horrela, bertaratutakoei bereziki, baina baita babestu gaituzten gainerakoei ere, eskerrak eman nahi dizkiegu gu ulertzeagatik, parte hartzeagatik eta babesagatik.
Herritarrek arazoa Tolosako alkatetzak baino hobeto ikusten dutelakoan gaude; izan ere, alkate anderearekin izan genuen bileran zer esan ez genekiela utzi gintuen alkate andereak.
Honako hitzak entzun genituen: «Osasungintza ez da udalaren konpetentzia…», «Kexarik ez bada…».
Eta kexarik ez izateagatik arazorik ez dagoela ulertu behar al dugu? Gure alkate andereak agian ez daki paziente batek «bizi konstante onargarriak» izanagatik ere «hilzorian» egon daitekeela, eta horixe bera da Tolosaldeko osasungintzarekin gertatzen ari dena. Horrek aldi berean Tolosaldeko ESI (Erakunde Sanitario Integratua) zuzentzen duen pertsona ere agerian jartzen du.
Gure iritziz guztiok ere herritarrekiko edo erabiltzaileekiko ardura handia dugu eta gure egiten dugu Medicusmundiren ondorioa, hain zuzen, osasungintza erabateko pribatizazio bidean dagoela eta horrek sortzen duen kezka.
Guk gure eskualdean osasungintza EZ diskriminatzeko mobilizatzen jarraituko dugu, eta horretarako egoerak eragiten dieten udaletxeetara, partidu politikoetara eta plataformetara joko dugu.
Horren harira, datorren hilaren 26an Donostiara (Pio XII biribilgunea-Osasungitza saila) gonbidatzen ditugu herritarrak 11:00etatik 12:00etara egingo dugun elkarretaratzera eta prentsaurrekora. Sailburu den Darpon jaunari dei egingo diogu entzun gaitzan.