%10,3 igo da Tolosaldeko biztanleria mende hasieratik

Tolosaldeko Ataria 2018ko urt. 22a, 13:13
Iturria: Berria.eus / Gaindegia

49.128 biztanle ditu Tolosaldeak, 2000. urtean baino %10,3 gehiago. Euskal Herriak, berriz, inoiz baino herritar gehiago ditu: 3.142.982. Mende hasieratik gaur arte %8ko igoera izan du biztanleriak, eta Zuberoak izan ezik, beste herrialde guztiek dituzte biztanle gehiago.

Are altuagoa izan da eskualdeko igoera: 2000. urtean baino %10,3 biztanle gehiago ditu Tolosaldeak. 49.128 dira, gara, guztira. 2000. urtean, adibidez, ia 44.500 pertsona bizi ziren. Gaindegiak eman ditu datuak asteburu honetan, iturri ofizialak baliatuta.

Joera, ordea, "metropolizazioarena" da. Gero eta jende gehiago bizi da hiriguneetan, eta ahultzen ari dira landa eremuak. Zuberoa, Erronkari-Zaraitzu, Irunberri aldea eedo Arabako Mendialdearen kasuak dira nabarmenenak.

Ez da hori, ordea, Tolosaldeko joera nagusia. 28 herrietatik hirutan baino ez da jaitsi biztanleria 2000. urtetik hona: Amezketan, Belauntzan eta Ibarran, hain zuzen. Badira ere beste zenbait herri 2000. urtetik hona biztanleak irabazi bai, baina azken urteotan beheranzko joera izan dutenak: Abaltzisketa, Alegia, Bidania-Goiatz, Gaztelu, Hernialde, Leaburu-Txarama eta Lizartza.

Igoerarik nabarmenena, berriz, Irurak egin du. Mende hasierako datuarekin alderatuz gero, bikoitza baino gehiago dira orain: 749 herritar izatetik 1.700dik gora izatera pasa dira.

Albiste osoa Berria.eus-en.

Iturria: datuak.net

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!