Loatzo musika eskolako ia herri gehienetan gaur arratsaldean egingo dituzte ekitaldiak. Bi abesti joko dituzte herri guztietan kalejirak hasi aurretik eta bukatu ondoren: Do Re Mi eta Bat, bi, hiru, lau abestiak batuz sortutakoa eta Don't worry, be happy. Ekitaldiak bukatu ondoren, merienda egingo dute herri guztietan.
Asteasun kontzertu berezia egingo dute etzi, Usarrabi frontoian. 80 musikaritik gora ariko dira oholtza gainean, mota guztietako musika eta instrumentuak jotzen. Dagoeneko laugarren edizioa du, eta urtetik urtera arrakasta handitzen doa. Gainera, edizio bakoitzean sorpresaren bat prestatzen dute antolatzaileek. Aurtengo edizioak, hain justu, gonbidatu berezi bat izango du: Eñaut Elorrieta gernikarra, Ken Zazpi talde ezaguneko kantaria. Zenbait kantu bakarrik egingo ditu, eta beste hainbatetan herriko musikariekin batera ariko da. Emanaldiaren sarrerak bi euro balio ditu.
Tolosari dagokionez, atzo kalejira berezia egin zuten musika eskolako ikasleek, Eduardo Mokoroa musikaria gogoan hartuz. Bestalde, igandean ohiko kontzertua izango da Leidor aretoan.
XEXILI EGUNAREKIN LOTUTAKO EKITALDIAK
Azaroak 22, gaur
Loatzo musika eskolako kideek antolatutako ekimenak:
Zizurkil. 18:00etan San Millan eskolatik abiatuko dira kalejiran eta Zimiteriora joango dira, bertan emanaldia egiteko .
Villabona. 18:00etan Errebote plazatik abiatu eta herritik kalejira egin ondoren Errebote plazan amaituko dute. Dultzaineroak eta txistulariak ariko dira kalejiran.
Irura. 18:00etan Loatzo plazatik abiatuko dira eta garbilekuan geldialdia egingo dute. Ondoren plazara abiatuko dira bertan amaitzeko. Eguzki Goxo abesbatzak ere parte hartuko du ekimenean.
Anoeta. 18:00etan Mikelasagasti aretoan emanaldia egingo dute, eta ondoren kalejira egingo dute plazaraino. Kuku abesbatzakoek parte hartuko dut ekimenean.
Ibarra. 18:00etan Txumitxa atzeko plazatik abiatuz, kalejira egingo dute plazaraino.
Alegia. 18:00etan eskolatik atera eta Larraitz auzoan kalejiran ibili ondoren plazan bukatuko da. Loatzoko ikasleen txaranga ariko da kalejiran.
Altzo. 18:00etan eskolatik abiatuko dira eta plazaraino joango dira.
Azaroak 24, ostirala
Asteasu. Usarrabi frontoian 22:00etatik aurrera 80 herritar elkartuko dira estilo anitzeko musika jotzen, gisa guztietako instrumentuekin. Eñaut Elorrieta bertan izango da gonbidatu gisa.
Azaroak 26, igandea
Tolosa. Udal Txistulari Bandak, Musika Eskolako dultzaineroek, Isidro Larrañaga akordeoi orkestrak eta Tolosako Musika Bandak kontzertua eskainiko dute, 12:00etan, Leidor aretoan.