Patricia Gete (Podemos-Ahal Dugu) eta Jon Albizu (EH Bildu) Gipuzkoako Batzar Nagusiko batzarkideek ebazpen proposamena aurkeztu dute gaur. Adierazi dute Diputazioaren erabakiak "ezinegona" eta "aurkakotasuna" sortu dituela hainbat herri eta sektoretan. "Murrizketek Tolosa, Villabona, N-1, Buruntzaldea eta Donostiako autobus loturei eragingo diete, eta kasu batzuetan, zerbitzuen erdia baino gehiago desagertu egingo dira", salatu dute.
Era berean, azaldu dute azken hilabetean Gipuzkoako Diputazioak 3.000 alegazio baino gehiago jaso dituela; tartean, baita LAB, ELA eta UGT sindikatuenak ere.
Gete eta Albizuk azaldu dutenez, Gipuzkoako Aldundiak aurreproiektua behin betiko onartuko balu, egungo garraio zerbitzuak murrizketa "nabarmena" jasango luke: "Gaur egun, autobus zerbitzuak 3,5 milioi kilometro egiten badituzte, aurreproiektu hau behin betiko egitasmo bihurtzen bada 2,7 milioi kilometro egingo lituzke. Horrek %23ko murrizketa orokorra esan nahi du eta zazpi lineatan izango luke eragina".
Azkenik, EH Bilduk eta Podemos-Ahal Duguk aurreproiektu hori bertan behera uzteko eskatu diote Foru Aldundiari eta udalerrietako ordezkariekin, sindikatuekin eta erabiltzaileekin konponbide adostu bat bilatzeko.