Partida txarra jokatu zuen igandean Iñaki Artolak Eibarko Astelena pilotalekuan. 11 pilota galdu zituen alegiarrak. Txanponaren beste aldean Jokin Altuna zegoen. Amezketarrak 11 tanto egin zituen, horietatik hiru sakez. Lau t’erdiko txapelketari begira, ondorio bat utzi zuen partidak: Iñaki Artola ez da finalerdietan egongo. Jokin Altuna egongo den edo ez, ligaxkako hirugarren partidan erabakiko da. Amezketarrak Ezkurdiaren aurka jokatuko du. Biak garaipen bakarrarekin daude. Irabazlea, Urrutikoetxearekin batera, finalerdietan izango da. Partida hori Tolosako Beotibar pilotalekuan jokatuko da igandean, 17:00etan hasiko den jaialdiaren barruan.
Promozio Mailan, Jon Ander Peñak garaipen garrantzitsua lortu zuen Ugalderen aurka, Astelenan. Tolosarra 22-15 nagusitu zitzaion oiartzuarrari. Garaipen horri esker, Peña II.ak txapelketan bizirik jarraitzen du. Finalerdietako ligaxka jokatzen ari dira lau pilotari, eta lehen bi sailkatuak zuzenean finalera pasako dira. Agirre nafarra bi garaipenekin finalean dago. Elordi eta Peña II.a garaipen bakarrarekin daude. Ugalde, aldiz, bi partida galdu ondoren finaletik kanpo dago. Agirreren aurka Jon Ander Peñak edo Elordik jokatuko dute. Ligaxkako azken jardunaldian erabakiko da, beraz, Lau t’erdiko Promozio Mailako finala zein izango den.
LAU T’ERDIKO TXAPELKETA
Lehen maila
Ligaxkako bigarren jardunaldia
Altuna III 22 - Artola 7
Hurrengo jardunaldiak:
Urriak 27, Balmaseda, 20:00etan
Urrutikoetxea - Artola
Urriak 29, Tolosa, 17:00etan
Ezkurdia - Altuna III
Promozio txapelketa
Ligaxkako bigarren jardunaldia
Ugalde 15 - Peña II 22
Hurrengo jardunaldia
Elordi -Peña II