Ligaxkara sartu ahal izateko lan ugari egin behar izan zuen atzo Iñaki Artolak. Tolosako Beotibar pilotalekuan Unai Lasoren aurka jokatu zuen alegiarrak, 213 zaleturen aurrean. 22-18 irabazi zuen Artolak, eta sakean oinarritutako garaipena izan zen, jokaldi horrekin sei tanto lortuz. Lasok bi besterik ez zizkion sartu alegiarrari. Artolari kosta egin zitzaion partidan agintzea. Jokoan asmatu ezinik ibili zen. 15-15 jarri ondoren, ordea, pilotari handia dela erakutsi zuen Artolak. Maisuki amaitu zituen tantoak zabalean, dejadaz, jarraian jokaldi horrekin lau tanto eginaz.
Bat eta bi
Asteburuan, eskualdeko hiru pilotari lau t’erdiko txapelketan aritu dira lehian. Horietatik bakarrak egin du aurrera: Jon Ander Peña tolosarrak. Hain justu Beñat Urretabizkaia ikaztegietarrari irabazi zion partida Peña II.ak. Promozio mailako norgehiagoketa Iruñeko Labrit pilotalekuan jokatu zen, larunbatean; eta tolosarra erraz nagusitu zitzaion ikaztegietarrari. Urretabizkaia ez zen fin ibili eta pilota dezente galdu zituen, batez ere, eskuinarekin. Garaipen horri esker, Jon Ander Peña final-laurdenetako ligaxkan sartu da. Agirre, Elordi eta Ugalde izango ditu txapelaren lehian aurkari.
Igandean Jakak jokatu zuen Logroñon, Victorren aurka. Lizartzarrak lehen mailako txapelketari agur esan behar izan zion, 22-4 galdu ondoren. Historia handirik gabeko partida izan zen. Errioxarrak sake errestoan min handia egin zion Jakari. Honek, aldiz, ez zuen batere asmatu, eta hortik markagailuko aldea.