Nafarroak eta Gipuzkoak elkar ukitzen dute, Zarateko lepoan, Balerdiren begiradapean. Ezkutuko ukitua da, ordea, zuhaizpe magikoaren itzaletan, eta sormen askerako gune bilakatzen du, horrek, txokoa. Bide horretatik ekin zioten, iaz, Azken Muga proiektuari, eta bigarrenez buru-belarri ari dira, aste honetan hasita. Gaur, erromeria doinuak dira nagusi.
Natur baliabideak erabiliz sortutako eskulturak ezagutzen hasi dute larunbata, eta segituan iritsi dira trikitilariak. Jende asko bidean zen, oraindik, ordea, autoz zein oinez, eta bazkaria prestatzen ari zirenei arindu die lana, musikak.
Txistulariak ere bertaratu dira, gero, eta egitasmoko ikur bilakatu den aulkitzarraren gainetik jo dute kantua, basoari eskaini nahiko baliote bezala.
Erromerietako legeei jarraiki, bazkaria ere bertan egingo dute, eta arratsaldera bitarte, izango da, behinola muga izandakoak senidetzeko gune bilakatzeko aukerarik.
Uda osoan barrena, beste hainbat hitzordu antolatu ditu Azken Muga proiektuak.
