Unai Iribarrek junior mailako Omnium proba zuen atzo jokoan, beraz, lau probatan lehiatu behar izan
zuen: Scratch, Tempo, kanporaketa eta puntuaketa. Tamalez, erorikoa izan zuen lehendabizikoan, goizean
goiz, Holandako ordezkariarekin batera, eta besoa kargaturik egin zituen eguneko beste hiru
lasterketak. Hala eta guztiz ere, erdi pareko postuetan ibili zen proba guztietan, eta hamazazpigarren
bukatu zuen Omnium-a, 42 punturekin.
Ane Iriarte berriz, puntuaketa proban lehiatu zen arratsaldean, 23 urtez azpikoen mailan, eta
bosgarren bukatu zuen, bakarkako ihesaldi batean taldeari buelta irabazita. Ongi asmatu zuen bere unea
aprobetxatzen, eta burutsu jokatu zuen lasterketa. Nekatuta, baina oso pozik bukatu zuen.
Gaurkoa ongi merezitako atseden eguna izango da eskualdeko bi kirolarientzat, eta bihar amaituko
dute Europako txapelketa binakako Madison probarekin, Xabier Mikel Azparren donostiarrarekin
Iribarrek, eta Ziortza Isasi elorriotarrarekin Iriartek.