Basamortuko beroa utzi eta, beste urtebetez, Euskal Herrira bidaiatu dute ehunka haur sahararrek. Tolosaldean 21 neska-mutil izango dira Oporrak Bakean proiektuari esker, eta atzo bertan egin zieten harrera, Tolosako Udaletxean.
Olatz Peon Tolosako alkateak azpimarratu zuen, haurren osasuna berreskuratzeko egonaldi ezin hobea dela udakoa eta, halaber, herri sahararraren egoera salatu zuen.
Izan ere, lehen egunetan mediku azterketak eta igeriketa ikastaroa egingo dituzte eta, gero, irteera eta askotariko jarduerez beteta izango dute uda. Egonaldia biribiltzeko, noski, sahararren agur festa ospatuko dute, Tolosan.
21 haur eta 10 familia
Guztira 21 neska-mutil iritsi dira Tolosaldera, eta 10 harrera familiatan pasatuko dute egonaldia: 6 Tolosan, 3 Anoetan eta 1 Villabonan. Beste 11 haurrak, berriz, Tolosako Udalak utzitako etxe batean egongo dira; aterpetxe gisa egokitu dute.
Bide horretan, Olatz Peon alkateak eskerrak eman nahi izan zizkien, atzo, bai familiei, bai aterpetxeko boluntarioei: "Haurren ongizatea buruan izan duzue. Mila esker guztiei, haur horiei eskainiko diezuen denbora eta, ziur naiz, maitasunagatik".