Berria Txapelketan Tolosa CF-Aurrerak finala jokatu zuen Hernanin, igandean, Usurbilgo Pagazperen aurka. Bikain hasi zen lehia, kadeteetan garaipena lortuz 22-7. Jubeniletan gauzak zail egongo zirela jakina zen, eta horrela izan zen: 5-22. Finala parean zegoen, eta nagusien mailako partidak erabakiko zuen txapela Usurbilera edo Tolosara joango zen. Labaka-Telletxea alde batetik, Santxo-Gorrotxategi bestetik. Azken hauek irabazi zuten norgehiagoka, 19-22, eskualdekoak ia-ian utziaz.
Tolosaldeko pilotaririk ez egon arren, Tolosako Beotibarren hiru txapela banatu ziren larunbatean, Lau t’erdiko San Juan Pilota Txapelketan. Kasu honetan ia-iako handirik ez zen egon, irabazleak kantxan nagusi izan zirelako. Kadeteetan Unai Alberdi; jubeniletan Mata eta etorkizunekoetan Zubizarreta. Pilotalekuak itxura ederra erakutsi zuen finalean, San Joan Egun handia izanagatik.