Asentzioko Feria ospatu zen igandean Aian. Egitarauaren barruan, azoka eta erromeriaren tartean, Gipuzkoako 2. mailako aizkolari txapelketaren kanporaketa jokatu zen. Hamaika aizkolari aritu ziren finalerako sei txartelen lehian. Horietatik bost Tolosaldekoak ziren, eta hiruk lortu zuten aurrera egitea: Jon Irazuk, Joseba Otaegik eta Jexuxmari Mujikak. Finala uztailaren 2an jokatuko da, 11:30ean, Usurbilen. Hor irabazle geratzen denak, txapela irabazteaz gain, hurrengo urtean Gipuzkoako lehen mailako txapelketa jokatuko du.
Aizkolari bakoitzak lau enbor ebaki behar zituen igandean. 54 ontzako bi eta 60 ontzako beste bi. Lanak egiten azkarrena Xabier Zaldua izan zen, 9.54,41-eko denborarekin. Bigarrena Jon Irazu zizurkildarra izan zen, bost segundora, eta 10 minututik jaitsiz. Hirugarrena, Joseba Otaegi, 10.12,89-an geratuz erlojua. Zizurkildarraren anaia, Unai Otaegi, lehian izan zen, baina ez zuen sei onenen artean sailkatzerik lortu. Lanak amaitzen laugarrena Luis Mari Txapartegi izan zen, 10.20, 21-eko denborarekin. Bosgarrena, Jexuxmari Mujika ibartarra, Txapartegiren denbora berean, baina 14 ehuneneko gehiagorekin. Seigarrena, eta finalerako sailkatzen azkena, Eneko Otaño izan zen, 10,21-eko denborarekin. Azken hiru aizkolariak, beraz, segundo bakarraren barruan ibili ziren.
Unai Otaegirekin batera, finaletik kanpo geratu zen eskualdeko beste ordezkaria Jokin Alkizalete asteasuarra izan zen. Aian egon ziren eta aurrera egin ez duten beste aizkolariak ondorengoa dira: Julen Aranberri Elorriaga II.a, Aratz Mugerza eta Aitor Urteaga.