Bidaniako frontoian jokatu dira partidak larunbat arratsaldean, 18:00etan hasita. Kadete mailan, Iker Zubeldia eta Pello Olano altzotarrak 22-12 irabazi diete Otaño-Elola bidania-goiaztarrei; joaneko partida ere altzotarrek irabazi zuten eta, orduan bezala, markagailuak azaltzen duena baino partida lehiatuagoa izan da. Olano nagusitu da atzeko koadroetan eta min handia egin du Zubeldiak sakeraekin. Oso txalotuak izan dira Otaño aurrelari herritarraren tanto politak.
Jubenil mailako partida ere, ekitaldiko bigarrena, altzotarrentzat izan da. Ander Zubeldia eta Enaitz Aizpitartek 22 eta 6 irabazi diete Agirretxe-Zinkunegiri. Altzotarrek berretsi egin dute joaneko partidan erakutsitako nagusitasuna. Pilotari luzeak dira bi altzotarrak eta nahikoa erraz autsi dute partida.
Kanporaketa guztiz erabakita zegoela, Altzo sailkatuta eta Bidania-Goiatz kanporatua, jokatu da nagusi mailako partida. Maila honetan, bidania-goiaztarrak gailendu dira berriro. Senperena-Galarragak 22 eta 9 irabazi diete Murua-Mujikari. Bidaniarrek, beren esperientzia inposatu dute, eta behin batean ondo ikasia ez zaiela ahaztu erakutsi.
Altzo izango da, beraz, Tolosaldeko bi herri hauen artetik aurrera egingo duena. Ez du urrutikoa hurrengo aurkaria, eskualdeko beste herri bat baitu: Zizurkil.