Miren Iraeta, Global training delako ikasle programaren bitartez ari da praktikak egiten, ADN zaharren inguruko ikerketa batean. Iñigo Pradak, berriz, Bioinformatikako Masterra burutzen dihardu. Beraiek izan ziren eginkizun honen antolakuntzan aritu zirenetako batzuk eta diotenez, "bertan zeuden euskaldun batzuk elkartu eta hirian dagoen laku baten inguruan bi kilometro eta erdi inguruko ibilbidea osatu genuen". Bideoan ikus daitekeenez, adin guztietako jendea bildu zen euskarari beren ekarpena egiteko asmoz. Oro har, Korrikan parte hartu zutenak, euskaldunak izan ziren.
Baina guztia ez zen hor amaitu. Korrika ospatu ondoren, folkets hus izeneko gaztetxe moduko batean, aurkezpentxo bat izan zuten, eta iluntzean, people's kitchen deituriko ekitaldia antolatu zuten bertakoek. Afari moduko horretara, "jende ugari hurbildu zela" diote, eta guztiek batera afaldu ostean, egunari amaiera eman zioten. Azkenik, "elkar ezagutu eta egun ederra igarotzeko aukera ona" izan zela nabarmendu nahi izan dute.