BatZuk dio aurtengo leloak, eta batzuk izan dira bai euskarari babesa eman eta korrika zeharkatu dutenak Tolosaldeko kale eta errepideak. Petoa jantzi, lekukoari heldu, pankarta atzean jarri eta lehen edizioaz geroztik ohikoak diren leloak kantatzen eman dituzte pausoak Tolosaldeko herritarrek, tipi-tapa, euskara aho eta mingainean, euskarari arnas emanaz.
ATSEDENIK GABEKOA
AEKri eta euskaltegian euskarara gerturatzen diren guzti horiei babesa eman diete herriz herri Tolosaldeko auzotarrek. Lizartzarrak izan dira goiztiarrenak euskararen akrobata izaera erakusten, iratzargailuak goiz jarrita eta 06:45ean heldu dio lehenengoz eskualdeak lekukoari. Leaburu-Txarama, Tolosa, Ibarra, berriro Tolosa, Anoeta, Irura, Amasa-Villabona, Zizurkil eta Aduna etorri dira atzetik. Gaurkoan ase ez direnak bigarren eguna ere izango dute Tolosaldean korrika egiteko; hitzordua Ikaztegietan larunbat goizaldeko 04:48an jarrita dago.