Tolosako Trianguloa plazan izan da agerraldia, eta bertan izan dira eskualdeko hainbat enpresa eta sindikatutako ordezkariak. "Erabakitzeko eskubidearen aldeko jarrera" argi plazaratuz, Tolosaldeko Giltzarriari babesa azaldu nahi izan diote publikoki eta, horrekin batera, eskualdeko herritarrak botoa ematera deitu: "Prozesuan parte aktibo izateko deia egin nahi dugu".
Bide beretik, nabarmendu dute, Tolosaldeko Giltzarriaren aldeko mozioa onartu egin dela aurkeztu duten enpresa guztietan, eta ELA, LAB nahiz CCOOko ordezkarien atxikimenduak ere badituztela. Horrela, honako enpresetako langileek babestu dute igandeko galdeketa: Etxesa-Gamesa Asteasu, Tolosako Udala, Asuncion klinika-Inviza, SAM, Munksjo, Talleres Nazabal, Arteca, Guibe, Laskorain Ikastola, Orbinox, Insalus, Fudike, Reprocel, Ados, Man, Leibi, Ebakilan, Cadinox eta Inoximet.