Zubimusu ikastolak Urrezko Bikain ziurtagiria lortu du

Bikain Ziurtagiria Eusko Jaurlaritzak ematen duen Euskararen Kalitate Ziurtagiri Ofiziala da, eta erakunde baten euskararen erabilera, presentzia eta kudeaketa neurtzen ditu.

Eusko Jaurlaritzak Villabonako Zubimusu ikastola saritu du Bikain, Euskararen Kalitate Ziurtagiria sariarekin. Urrezko ziurtagiria jaso du Zubimusuk, erakundearen komunikazioan eta irudi korporatiboan, eta kanpo zein barne harremanetan euskararen presentzia, erabilera eta kudeaketa goi mailakoa izateagatik. Ziurtagiri ofiziala, publikoa eta doakoa da Bikain. 

18 arlo neurtzen dira
Bikain ziurtagiria lortzeko 18 arlotan euskararen erabilera nolakoa den neurtzen du Eusko Jaurlaritzak: harreran, bezeroekin  eta hornitzaileekin izandako harremanetan, eskaintzen duten zerbitzuan, administrazioan, enpresaren edo erakundearen estrategian eta kudeaketan, giza baliabideetan…

Ebaluazio taldeak arlo horietan euskararen presentzia, erabilera eta kudeaketa neurtzen ditu, enpresa eta erakunde bakoitzaren puntu gorenak eta ahulak identifikatu eta aurrera egiteko praktika egokiak aholkatuz. Aurten, azaroaren 16tik 24ra bitartean egin ditu Jaurlaritzak Bikain ziurtagirien kanpo ebaluazioak.

Aurten, orotara, jarduera ekonomiko desberdinetako 52 erakundek jaso dute ziurtagiria: 19 entitatek urrezko ziurtagiria, 22k tartekoa den zilarrezko ziurtagiria eta beste 11k oinarrizko mailari dagokiona.

Aste honetan izan da Ana Santamaria zuzendaria ziurtagirien banaketa ekitaldian, Donostiako Kursaal jauregian. Iñigo Urkullu Eusko Jaurlaritzako lehendakariarekin batera, bertan izan ziren enpresa, politika eta gainerako gizarte sektoreetako hainbat ordezkari ere. Guztira 400 pertsona inguruk parte hartu du Euskararen Kalitate Ziurtagirien 9. edizioaren sari banaketan.

Auzia ez da izan ala ez izan. Kontua ekitea da. Atarikide egitea, euskararen aldeko hautua egitea, zure herrian gauzak antolatzea, horren berri ematea, etxetik plazara salto egitea. TOLOSALDEKO ATARIA egiten duzun hori da. Egiten duzun neurrian gara.


EGIN ATARIKIDE!