Ireki ditu jada ateak Kaleraguneak Usurbilen. Hilabete inguru iraungo duen itxialdia egingo dute bertan, "euskal preso, iheslari eta deportatuak Euskal Herrira ekartzeko". 400 preso ohik baino gehiagok eman dute izena txandak betetzeko, Jokin Aranalde preso ohiak adierazi duenez.
Hilabete osoan zehar, hainbat ekitaldi izango dira Usurbilen zein Euskal Herri osoko herrietan: martxak, auto karabanak, elkarretaratzeak, manifestazioak, argazki kolektiboak edota kantujirak. Ekitaldi horien guztien helburua bera izango da: euskal preso politikoen etxeratzea aldarrikatzea: "Euskal Herrian bakea nahi dugu, eta ez da benetako bakerik izango euskal presoak espetxean dauden bitartean", azaldu du Aranaldek.
Eskualdeari dagokionez, honako ekimenak antolatu dituzte datozen egunetarako:
ABENDUAK 17, LARUNBATA
Anoeta eta Ibarra. Kalera egunak.
ABENDUAK 24, LARUNBATA
Tolosaldea. Herriz herri argazki herritarrak.
ABENDUAK 16, 23 ETA 30, OSTIRALAK
20:00. Manifestazio argitsuak Villabonan.
URTARRILAK 6, OSTIRALA
18:30. Haizearen Orrazian, ekimen nazionala.