Sekula baino bereziagoa izango da, aurten, Segurako dantza sueltoko txapelketa. Baratze pilotalekuak 40. Euskal Herriko txapelketa hartuko du, eta Tolosaldeak ordezkaritza zabala izango du bertan.
Guztira 10 bikote ariko dira fandango eta arin-arin finena biribiltzeko lehian. Txistularien doinuan dantzatuko dute fandangoa eta, arin-arina, berriz, urteroko moduan, trikiti eta panderoak eskainiko dizkie dantzariei.
Zozketa bidez aukeraturiko hurrenkerak hala erabakita, Iratxe Lizarburu ibartarra eta Ibai Jimenez zaldibiarra lehenak izango dira oholtzaratzen, Ibarra ordezkatuz. Oin eta besoak mugitzen bigarrenak izango dira Ane Urruzola billabonatarra eta Iker Sanz lezoarra, eta Villabona ordezkatuko dute. Azkenik, Irura ordezkatuz dantzatuko dute Xabier Artola irurarrak eta Idoia Besada pasaitarrak, bosgarren lekuan.
18:00etan hasiko da txapelketa eta, urteurrenaren berezitasuna medio, Seguran egun osoko festa izango da dantzaren inguruan. Estreinakoz, gainera, sarrera aurrez eskuratzeko aukera izan da.
Eskualdeko hiru dantzari, Euskal Herriko sueltoko lehian
Larunbatak hartuko du Euskal Herriko 40. dantza txapelketa, Seguran; Xabier Artola, Iratxe Lizarburu eta Ane Urruzola lehian ariko dira.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!