Enirio-Aralar

[Gutuna] Aralar barrenean pista proiektua

Koro Irazustabarrena / Edurne Huesa 2016ko uzt. 14a, 16:02

Goierriko Landarlan Ingurumen Elkarteak, Ordiziako udaleko buletinaren bidez, urtarrilean izan zuen Enirio-Aralarko Mankomunitateak aurten egingo duen 517.000 euroko inbertsioaren berri. Larreak hobetzeko, ur hornidura asetzeko, txabolak konpontzeko, itxiturak egiteko, abereen gaixotasunak ekiditeko eta, batez ere, mendi bideak egiteko izango da. Hori dela eta, bitan eskatu dugu bilera mankomunitateko lehendakari den Ordiziako alkatearekin, Aralar Natur parkearen kontserbazioa eta artzantza hobetuko duten proposamen jasangarriak luzatzeko. Baina ez dugu erantzunik jaso, ezta foru aldundiari bitan egindako informazio eskaerena ere, parkeko patronatuko kidea izanik.

Ekainaren 13an, Aralarko txaboletara eta Saltarrirako pistaren ingurumen ebaluazio sinplifikatua egiteko agiriak argitaratu dira, hilabeteko epearekin helegiteak egiteko. Nahiz eta Aralar mendi publikoa eta Natur Parkea izan, ez zaio proiektu honi inongo publizitaterik egin, ez komunikabideetan, ez Ordiziako buletinean, eta soilik foru aldundiaren web orrian argitaratu dute. Gainera, dokumentazio gehiena gaztelera hutsean dago, eta euskaraz dagoen bakarrak akats handiak ditu.

Proiektua gazteleraz aztertzera behartuta, ikusten dugu oso erasokorra dela Aralar Natur Parkerako, maiatzaz geroztik Natura 2000 europar sareko (http://www.ingurumena.ejgv.euskadi.eus/r49-orokorra/eu/contenidos/noticia/2016_05_31_ 33077/eu_33077/33077.html) Babes Bereziko Eremua izendatuta. Intzesaotik Saltarrira 4,4 kmko eta, gutxienez, 3 metroko zabalerako pista egingo litzateke, eta Elutxeta inguruan 96 m-ko eta batazbeste 5 m-ko altuerako harri lubeta. Horrelako pista egiten bada, paisaian, natur ingurunean, eremu karstikoan eta lur azpiko uretan inpaktua ikaragarria izango dela aurrikusten dugu, eta horiek ez dira nahikoa baloratu proiektu horretan.

Horregatik guztiagatik, mankomunitateari eta foru aldundiari eskatu diegu proiektua bertan behera uzteko eta, orain arte, ez dugu inongo erantzunik jaso. Era berean, Aralarko artzantza eta kontserbazioaren aldeko neurriak, artzain, ganaduzale, mendizale, kontserbazionsita, zientzilari eta hainbat interesetako herritarrekin batera adostea eskatzen dugu, horrelako inpaktuak sortu gabe.

Halaber, Aralarko etorkizunaz kezkatuta diren mankomunitateko herrietako (Abaltzisketa, Altzaga, Amezketa, Arama, Ataun, Baliarrain, Beasain, Gaintza, Ikaztegieta, Itsasondo, Lazkao, Legorreta, Ordizia, Orendain eta Zaldibia) biztanleei eskatzen diegu, beren herriko alkate eta zinegotziei kezka hauek helarazteko.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!