330 pilotari hasi ziren II. Ataria Pilota Txapelketan, eta 28 bakarrik gelditzen dira. Zazpi final jokatuko dituzten neska-mutilak dira. Sailkatzen azkenak iragan asteburukoak izan ziren. Albiztur, Ikaztegieta, Amezketa, Bidania-Goiatz eta Zizurkilen jokatu ziren azken finalerdiak. Irabazleek aurrera egin zuten, eta galtzaileak, sustoa pasata, hurrengo urtera begira jarri ziren.
Finalak uztailaren 2an jokatuko dira, Villabonako Bearzana pilotalekuan. Lehen edizioan Tolosan jokatu ziren azken partidak, baina Ataria Txapelketa eskualde guztira zabaldu nahi dute antolatzaileek, eta horregatik aldaketa. Esku pilotan eta palaz ariko dira finalistak, zazpi mailatan banatuta. Zaletuei ere bertaratzeko gonbitea luzatzen zaie.