Berpizten ari da Aiztondoko Denbora Bankua. Jende gehiagorengana eta bailarako beste herrietara zabaldu nahi dute jarduna. Denbora bankuak gehien funtzionatu duten garaiak, krisi garaiak izan dira. «Baina nik uste gizartean funtzionatzeko era polit eta gertuko bat izan daitezkeela denbora bankuak. Herriz herriko jendearen artean sareak sortu eta diruarekiko hainbesteko dependentzia ez edukitzeko modu bat da». Aiztondoko Denbora Bankuko kide den Eider Ezeiza adunarraren iritzia da.
«Zaintzan oinarritu nahi dugu gure bizitza, hori jarri nahi dugu zentroan. Gure burua, inguruko jendea eta natura zaintzeko prozesu horretan, gertutasunean egiten baditugu gauzak, bizitza bizigarriago bat izango dugu».
Duela zortzi urte inguru sortu zen Aiztondoko Denbora Bankua. Aiztondoko Zerbitzuen Mankomunitateko teknikari baten eskutik sortu zen eta gaur egun, 6-8 pertsonako talde bat dabil bankua kudeatzen. 20 lagun inguruk maiztasunez hartzen du parte ekimenean.
Zerbitzuak trukatzeko modu bat da eta denbora da trukerako erabiltzen duten neurria. «Egunerokotasunean ditugun beharrak, kanpotik estali beharrean gure artean asetzen ditugu: gertutasunean, konfiantzaz eta gure arteko sarea sortuz», dio Ezeizak.
Izen emateko orrian jartzen du jendeak eskaintzeko prest dagoena. «Askotan pentsatzen dugu, oso ondo egiten dakigun hori bakarrik eskaini dezakegula, baina ez da prestaketa berezirik behar elkarri laguntzeko. Guk uste duguna baino gaitasun gehiago dauzkagu».
Alkizan, Larraulen, Adunan eta Asteasun egin dituzte orain arteko Truke Azokak eta bosgarrena Zizurkil Goian egingo dute igandean. Aurrerantzean ekimen honetan parte hartzera gonbidatu dituzte herritarrak eta helbide bat utzi dute haiekin harremanetan jartzeko: aiztondokodenborabankua@gmail.com.
TRUKE AZOKA
EKAINAK 19, IGANDEA
10:30 - 14:00. Mota guztietako gauzak eta zerbitzuak trukatzeko aukera izango da, eta Denbora Bankuari buruzko informazioa emango dute.
10:30 - 12:00. Jostungintza (konponketa errazak), Gure baitan, ingeleseko mintzapraktika... tailerrak egingo dira.
12:00. Solasaldia egingo da ekonomia solidario, ekologiko eta feministari buruz.
Eguerdian. Truke-bazkaria egingo da. Norberak nahi duen janaria eta edaria eman dezala, gainerakoekin trukatu, dastatu eta gozatzeko.