Bertan, boluntarioak prest, azken zorionak eta txaloak parte hartzaileei eskainiz. Txaloez gain, beste zerbaiten bila ere sartu dira parte hartzaileak estadiora, norberak bere diploma jaso du martxaren azken mahaian.
Ikusleak, harmailetan, belarretik urrun. Txalo zaparradak eskainiz senide eta lagunei. Hamalau orduz tipi-tapa, tirriki-tarraka mendi, bide eta errepidetik pauso bat eta hurrengoa eta hurrengoa emanez aritu diren horiei euren indarra erakutsiz. Eta mendizaleak pozik, harmailetako giroa ikusita, martxan izandako makuluek orduan gora egiten zuten, senideei agurra bueltatuz.
Lau urteroko irudia ordea ez da Berazubin ikusi aurtengoan. Izan ere, bisitentzako gunea harmailetan kokaturik zegoenez, erdiko belargunea aurten hutsik ikusi da. Mendizale gutxi batzuk martxa amaituta derrigortutako luzaketak bertan egin baina gehienak gertukoengana alde egin dute.
